Samarqandda bank xodimi mijozning 33 mln so'mini o'zlashtirdi

Samarqandda bank xodimi mijoz nomiga 50 mln so'm kredit rasmiylashtirib, mablag'ning bir qismini o'zlashtirdi

Samarqand viloyati Oqdaryo tumanida bank tizimi bilan bog'liq yirik firibgarlik jinoyati fosh etildi. Bu haqda Zamin.uz xabar berdi.

Tergov materiallariga ko'ra, bank mutaxassisi X.T. fuqaro J.Sh.ga 17 mln so'm miqdorida kredit rasmiylashtirishda yordam berishni va'da qilgan.

Biroq amalda bank xodimi mijoz nomiga 50 mln so'm miqdorida qarz yukini yuklab, ushbu mablag'ning 33 mln so'mini yashirincha naqdlashtirib olgan. Jabrlanuvchiga esa go'yoki bank faqat 17 mln so'm ajratganligi haqida yolg'on ma'lumot taqdim etilgan.

Huquqni muhofaza qiluvchi organlar tomonidan o'tkazilgan surishtiruvlar natijasida o'zlashtirilgan mablag'lar to'liq qaytarildi. Mazkur holat yuzasidan Jinoyat kodeksining 168-moddasi bilan jinoiy ish ochilgan.

Ushbu voqea fonida Adliya vazirligi va Markaziy bank tomonidan tasdiqlangan yangi tartib kuchga kirdi. Endilikda, agar fuqaro nomiga firibgarlik yo'li bilan onlayn kredit olingani tergov yoki sud tomonidan tasdiqlansa, bank ushbu kredit bo'yicha asosiy qarz va foizlarni undirishni darhol to'xtatishi shart.

Yangi me'yorga ko'ra, yetkazilgan zarar mijozdan emas, balki bevosita aybdor shaxsdan undiriladi. Banklar o'z yo'qotishlarini firibgardan regress tartibida talab qilish huquqiga ega bo'ldi.

Mutaxassislar bank mijozlarini moliyaviy amaliyotlarda hushyorlikni oshirishga chaqirmoqda. Kredit shartnomalari bilan shaxsan tanishish va karta hisobidagi o'zgarishlarni muntazam nazorat qilish tavsiya etiladi.

Shubhali holatlar aniqlangan taqdirda, fuqarolar darhol huquqiy himoyaga murojaat qilishlari zarur.