Toshkent shahrining Chilonzor tumanida taqiqlangan moddalar, xususan, gashish moyi aralashtirilgan qandolat mahsulotlarini ishlab chiqarishga mo‘ljallangan yashirin laboratoriya faoliyati fosh etildi. Bu haqda Zamin.uz xabar berdi.
Huquqni muhofaza qiluvchi organlar tomonidan o‘tkazilgan tezkor tadbirlar natijasida ushbu noqonuniy harakatlarga aloqadorlikda gumon qilingan ikki nafar fuqaro qo‘lga olindi. Ichki ishlar vazirligi tomonidan taqdim etilgan ma’lumotlarga ko‘ra, mazkur jinoyat zanjirini aniqlash jarayoni Yashnobod tumanida boshlangan.
Dastlab huquq-tartibot idoralari xodimlari internet tarmog‘i orqali narkotik moddalar savdosini amalga oshirib kelgan narkodo‘kon kuryerini qo‘lga olishgan. Tergov harakatlari davomida kuryer orqali olingan ma’lumotlar asosida Chilonzor tumanidagi xonadonlardan birida narkotik moddalar tayyorlashga ixtisoslashgan yashirin ustaxona borligi aniqlandi.
Ayni paytda mazkur holat yuzasidan tegishli tartibda surishtiruv ishlari davom etmoqda va qo‘lga olingan shaxslarning qilmishlariga qonuniy baho berilishi ta’minlanadi. Tergov jarayoni doirasida ushbu noqonuniy tarmoqning boshqa ishtirokchilarini aniqlash choralari ko‘rilmoqda.
Izohlar
0