O‘zbekiston aholisi orasida ovqatlanish jarayonida yoki taom iste’mol qilgandan so‘ng darhol qaynoq ko‘k choy ichish uzoq yillik an’anaga aylangan. Bu haqda Zamin.uz xabar berdi.
Ko‘pchilik bu odat ovqat hazm qilish tizimini yaxshilashga va yog‘larni samarali parchalashga yordam beradi deb hisoblaydi. Biroq tibbiyot mutaxassislari hamda parhezshunoslar olib borgan tadqiqotlar va xulosalar buning aksini ko‘rsatmoqda.
Mutaxassislarning ta’kidlashicha, taom ustidan choy ichish organizm uchun kutilmagan salbiy oqibatlarni keltirib chiqarishi mumkin bo‘lgan keng tarqalgan xatolardan biridir. Choy tarkibidagi tanin moddasi oziq-ovqat mahsulotlari, xususan, go‘sht va dukkakli o‘simliklar tarkibidagi temir moddasining so‘rilish jarayonini sezilarli darajada susaytiradi.
Bu esa uzoq muddatda organizmda temir tanqisligiga, ya’ni anemiyaga olib kelishi mumkin. Shuningdek, ovqat hazm qilish davrida suyuqlik ichish oshqozon shirasining konsentratsiyasini pasaytirib, hazm qilish jarayonini qiyinlashtiradi.
Shifokorlar ovqatlanishdan kamida bir soat oldin yoki keyin choy ichishni tavsiya etishadi. Bu oddiy qoidaga amal qilish oshqozon-ichak tizimi faoliyatini me’yorlashtirish va moddalar almashinuvini yaxshilashda muhim ahamiyat kasb etadi.
Izohlar
0