O‘zbekistonning axborot texnologiyalari va kiberxavfsizlik sohasida jiddiy xavotir uyg‘otuvchi holat qayd etildi. Bu haqda Zamin.uz xabar berdi.
Darknet tarmog‘idagi yashirin domenlardan birida faoliyat yurituvchi BUTTERFLY nomli xakerlar guruhi O‘zbekiston Respublikasi Adliya vazirligi huzuridagi Personallashtirish agentligining himoyalangan ma’lumotlar bazasiga noqonuniy kirishga muvaffaq bo‘lganini e’lon qildi. Mazkur guruh o‘z bayonotida 27 milliondan ortiq O‘zbekiston fuqarosiga tegishli shaxsiy ma’lumotlarni qo‘lga kiritganini da’vo qilmoqda.
Ushbu hodisa mamlakatning raqamli xavfsizlik tizimi uchun jiddiy sinov hisoblanadi. Mutaxassislar xakerlar tomonidan e’lon qilingan axborotlarning haqiqiyligini tekshirish va tizimdagi bo‘shliqlarni aniqlash yuzasidan izchil ish olib bormoqda.
Hozircha tegishli davlat idoralari tomonidan ushbu kiberhujumning ko‘lami va uning oqibatlari yuzasidan rasmiy ma’lumotlar kutilmoqda. Kiberxavfsizlik ekspertlari fuqarolardan o‘z shaxsiy ma’lumotlari xavfsizligini ta’minlashda hushyor bo‘lishni va shubhali xabarlarga nisbatan ehtiyotkorlik bilan yondashishni so‘ramoqda.
Vaziyat tegishli huquqni muhofaza qiluvchi organlar va axborot xavfsizligi mutaxassislari nazoratiga olingan. Ushbu voqea davlat idoralari ma’lumotlar bazalarini himoyalash tizimini qayta ko‘rib chiqish va yanada takomillashtirish zaruratini yana bir bor dolzarb qilib qo‘ydi.
Izohlar
0