AQSHning Vigil Autonomy kompaniyasi harbiy texnika va piyoda qo‘shinlarni zamonaviy kuzatuv vositalari, xususan, razvedkachi dronlar hamda sun’iy yo‘ldoshlar nigohidan yashirishga qodir yangi kamuflyaj texnologiyasini namoyish etdi. Bu haqda Zamin.uz xabar berdi.
Mutaxassislar tomonidan uchar gilam deya ta’riflanayotgan ushbu innovatsion tizim jang maydonidagi obyektlarni dushman nazoratidan himoya qilishda muhim ahamiyat kasb etishi kutilmoqda. Texnik xususiyatlariga ko‘ra, mazkur ishlanma ikki soatgacha bo‘lgan vaqt davomida uzluksiz faoliyat yuritish imkoniyatiga ega.
Tizimning asosiy vazifasi harakatlanayotgan yoki muayyan hududda joylashgan harbiy birliklarni optik va elektron kuzatuv tizimlaridan yashirishdan iborat. Bu o‘z navbatida, jangovar harakatlar chog‘ida texnika va shaxsiy tarkibning xavfsizligini ta’minlash, shuningdek, kutilmagan hujumlarning oldini olishga xizmat qiladi.
Hozirgi kunda zamonaviy urushlarda dronlarning keng qo‘llanilayotganini inobatga oladigan bo‘lsak, bunday turdagi himoya vositalarining ishlab chiqilishi harbiy strategiyadagi yangi bosqichni anglatadi. Vigil Autonomy muhandislari ushbu tizimni yanada takomillashtirish va uni turli sharoitlarda sinovdan o‘tkazish ishlarini davom ettirmoqda.
Izohlar
0