Andre-Pyer Jinyak "Tigres" bilan xayrlashmoqda Fransiyalik tajribali hujumchi Andre-Pyer Jinyakning professional faoliyati yakuniga yetmoqda. Bu haqda Euro-football.ru xabar berdi.
40 yoshli futbolchi Meksikaning "Tigres" klubi bilan amaldagi shartnomasini uzaytirmasligini ma'lum qildi. Jinyak oxirgi o'n bir yil davomida ushbu jamoa safida to'p surib, 200 tadan ortiq gol urishga muvaffaq bo'ldi va klubning haqiqiy afsonasiga aylandi.
Hozirda muxlislar hujumchining jamoa tarkibidagi so'nggi uchrashuvlarini kuzatmoqdalar. O'tgan dam olish kunlari Jinyak "Masatlan"ga qarshi bahsda o'z maydonida so'nggi bor chempionat o'yinini o'tkazdi.
Uchrashuvning 10-daqiqasida, futbolchining o'yin raqamiga ramziy ishora sifatida, "Tigres" muxlislari bir ovozdan "Mersi Jinyak" deya hayqirib, unga minnatdorchilik bildirdilar. Mazkur bahs "Tigres"ning 5:1 hisobidagi yirik g'alabasi bilan yakunlandi.
Garchi Jinyak ushbu o'yinda gol ura olmagan bo'lsa-da, u muddatidan avval almashtirilayotganida tribunalarni to'ldirib turgan minglab ishqibozlar uni tik turib, davomli olqishlar bilan kuzatib qo'ydilar. Fransiyalik futbolchi Meksika futboli tarixida eng sermahsul va muvaffaqiyatli legionerlardan biri sifatida qoladigan bo'ldi.
