Rossiyalik taniqli ijrochi JONY, ya’ni Jahid Huseynli salomatligi bilan bog‘liq jiddiy xabarlar jamoatchilik e’tiborini tortdi. Bu haqda Zamin.uz xabar berdi.
Mash Telegram kanali o‘z manbalariga tayanib xabar berishicha, xonandada kam uchraydigan irsiy xastalik aniqlangan. Dastlabki ma’lumotlarga ko‘ra, san’atkorda oilaviy O‘rta yer dengizi isitmasi tashxisi qo‘yilgan.
Tibbiyot mutaxassislarining ta’kidlashicha, mazkur patologiya organizmda o‘ziga xos belgilar bilan namoyon bo‘ladi. Xususan, bemorda tana haroratining kutilmaganda keskin ko‘tarilishi, qorin bo‘shlig‘i, mushaklar hamda bo‘g‘im sohalarida kuchli og‘riqlar kuzatilishi mumkin.
Ushbu irsiy kasallik surunkali tus olishi va bemorning umumiy ahvoliga ta’sir ko‘rsatishi bilan xavflidir. Hozirgi vaqtda xonandaning ahvoli va davolanish jarayoni yuzasidan boshqa tafsilotlar ochiqlanmagan.
JONY va uning vakillari mazkur tibbiy holat yuzasidan rasmiy bayonot berishmagan. San’atkorning muxlislari uning tezroq sog‘ayib, ijodiy faoliyatini davom ettirishini tilab qolishmoqda.
Vaziyat rivoji kuzatuv ostida qolmoqda.
Izohlar
0