Rossiya ilovalari smartfonlarda VPN dasturlarini aniqlashni boshladi

Rossiya ilovalari VPN ishlatayotgan foydalanuvchilarni aniqlashni boshladi

Rossiyadagi eng ommabop Android ilovalari VPN tarmoqlarini aniqlash mexanizmlarini keng miqyosda joriy etmoqda. Bu haqda Zamin.uz xabar berdi.

Ixbt.com nashrining "RKS Global" kompaniyasi ma'lumotlariga tayanib xabar berishicha, o'rganilgan 30 ta mashhur dasturning 22 tasi VPN ulanishini aniqlash imkoniyatiga ega. Ulardan 19 tasi ushbu ma'lumotlarni to'g'ridan-to'g'ri dasturchilar serveriga yo'llaydi.

Tadqiqotlar shuni ko'rsatadiki, aprel oyi o'rtalariga kelib ushbu ko'rsatkich 100 foizga yetgan. Dasturlar nafaqat VPN ulanishini tekshiradi, balki tarmoq marshrutlari hamda DNS sozlamalarini ham tahlil qiladi.

Xususan, "Wildberries", "Ozon", "2GIS" va "RuStore" kabi platformalar qurilmaga o'rnatilgan barcha VPN ilovalari ro'yxatini so'rab oladi. Bu esa foydalanuvchi aynan qaysi servis xizmatidan foydalanayotganini aniqlash imkonini beradi.

"Yandex" kompaniyasi mahsulotlari ushbu jarayonda alohida ajralib turibdi. Kompaniyaning barcha ilovalari VPN holatini yagona server orqali nazorat qiladi va masofadan turib buyruqlarni qabul qila oladi.

Shuningdek, "Yandex Browser" smartfon xotirasida Tor tarmog'iga oid izlarni qidirishi ma'lum bo'ldi. Mutaxassislar bunday mexanizmlar firibgarlikka qarshi oddiy himoya vositasi bo'lmay, shaxsiy hayot daxlsizligiga jiddiy tahdid ekanini ta'kidlamoqda.