Reddit foydalanuvchisi Temu platformasidan 20 dollarga soxta disk sotib oldi

Temu marketpleysida 4 TB hajmli tashqi xotira qurilmasini 20 AQSh dollariga sotib olgan mijoz firibgarlik qurboni bo'ldi. Bu haqda Zamin.uz xabar berdi.

Reddit platformasining Raw_Stank ismli foydalanuvchisi xarid qilgan qurilmasi soxta bo'lib chiqqanini ma'lum qildi. Bu haqda Ixbt.com nashri xabar bermoqda.

Xaridor qurilmani ochib ko'rganda, korpus ichida qattiq disk o'rniga yelim bilan yopishtirilgan oddiy microSD-kartrider borligini aniqladi. Foydalanuvchining ta'kidlashicha, mahsulot narxi boshidanoq shubha uyg'otgan.

Taqqoslash uchun, Amazon platformasida xuddi shunday sig'imga ega WD My Passport diski bir necha barobar qimmatroq sotiladi. Foydalanuvchi forumda qurilmaning ichki ko'rinishi aks etgan suratni ilova qilib, o'z qarorini kinoya bilan izohladi.

Uning so'zlariga ko'ra, narxning pastligi uni tavakkal qilishga undagan, biroq natija kutilganidek bo'lib chiqqan. Mazkur holatdan so'ng Temu ma'muriyati mijozga sarflangan mablag'ni to'liq qaytarib berdi.

Mutaxassislar onlayn platformalarda o'ta arzon narxdagi texnik jihozlarni sotib olishda ehtiyotkor bo'lishni tavsiya qilmoqda.