Ohangaronda 14 yoshli qiz bilan bog'liq iddaolar asossiz deb topildi

Ohangaron shahrida PPX xodimi bilan bog'liq hodisa yuzasidan tekshiruv o'tkazildi

Toshkent viloyati Ichki ishlar bosh boshqarmasi Ohangaron shahrida sodir bo'lgan va ijtimoiy tarmoqlarda keng muhokama qilingan hodisa yuzasidan rasmiy ma'lumot berdi. Bu haqda Zamin.uz xabar berdi.

Boshqarma axborot xizmati xabariga ko'ra, patrul-post xizmati xodimining harakatlari bo'yicha tarqalgan ma'lumotlar dastlabki tekshiruvlar davomida o'z tasdig'ini topmadi. Rasmiy bayonotda keltirilishicha, voqea 27 aprel kuni soat 00:40 atrofida yuz bergan.

Xizmat vazifasini bajarayotgan PPX xodimiga uning tanishi, 22 yoshli A.K. ismli ayol qo'ng'iroq qilib, maslahat so'rash maqsadida uchrashuvga chaqirgan.

Xodim belgilangan manzilga yetib borganda, ayol va uning 14 yoshli tanishi avtomashinaga o'tirgan. Shu vaqtda 18 yoshli A.X.

to'rt nafar sherigi bilan kelib, xodimni haqorat qilgan va mojaro keltirib chiqargan. Aniqlanishicha, videoxabar muallifi bo'lgan ushbu shaxs 14 yoshli qizga qarindosh emas.

Ichki ishlar organi voyaga yetmagan shaxsning daxlsizligini ta'minlash maqsadida barcha tafsilotlar ochiqlanmasligini, surishtiruv ishlari qonuniy tartibda davom etayotganini bildirdi. Shu bilan birga, tekshiruv yakuniga ko'ra asossiz ma'lumot tarqatgan shaxslarga nisbatan ma'muriy yoki jinoiy javobgarlik choralari ko'rilishi haqida ogohlantirish berildi.

Avvalroq Ichki ishlar vazirligi Jamoat xavfsizligi departamenti xodim xizmatdan vaqtincha chetlashtirilganini e'lon qilgan edi. Hozirda yakuniy xulosa chiqarilmagan bo'lib, rasmiylar jamoatchilikni faqat tasdiqlangan ma'lumotlarga tayanishga chaqirmoqda.