NVIDIA iyun oyidan RTX 3060 video kartalarini ishlab chiqarishni qayta boshlaydi

NVIDIA RTX 3060 video kartalarini ishlab chiqarishni qayta boshlaydi

NVIDIA kompaniyasi joriy yilning iyun oyida 12 GB xotira sig'imiga ega RTX 3060 video kartalarini ishlab chiqarishni qayta yo'lga qo'yadi. Bu haqda Zamin.uz xabar berdi.

Mazkur qurilmalar yaqin vaqt ichida cheklangan miqdordagi partiyalar bilan bozorga chiqariladi. Bu haqda Ixbt.com nashri ma'lumot tarqatdi.

Xabarga ko'ra, ASUS, MSI, Colorful va Galax kabi yirik hamkor kompaniyalar ushbu butlovchi qismlarning muayyan miqdorini qabul qilib oladi. Biroq har bir ishlab chiqaruvchi uchun belgilangan kvotalar hajmi turlicha bo'lib, umumiy taklif miqdori cheklangan darajada qolishi kutilmoqda.

12 GB xotirali RTX 3060 modeli NVIDIA tarixidagi eng muvaffaqiyatli va ko'p sotilgan mahsulotlardan biri sanaladi. Qurilma o'zining narx va sifat mutanosibligi tufayli 1080p hamda 2K o'lchamli o'yin segmentida uzoq vaqt davomida yetakchilik qilib kelmoqda.

Ishlab chiqarish jarayonining tiklanishi shunchaki omborlardagi qoldiqlarni sotish emas, balki bozorning barqaror va hamyonbop video kartalarga bo'lgan talabini qondirishga qaratilgan strategik harakat sifatida baholanmoqda.