Apple Mac mini'ning 256 GB xotirali modelini sotuvdan oldi

Apple kompaniyasi Mac mini uchun 256 GB xotira variantini sotuvdan oldi

MacRumors nashri bergan ma'lumotga ko'ra, Apple butun dunyo bo'ylab Mac mini kompyuterining 256 GB xotiraga ega bazaviy modelini taklif qilishni to'xtatdi. Bu haqda Zamin.uz xabar berdi.

Mazkur o'zgarish natijasida ushbu ish stoli qurilmasining boshlang'ich narxi sezilarli darajada ko'tarildi. Xususan, AQSh bozorida M4 chipli, 16 GB operativ va 512 GB doimiy xotirali Mac mini endilikda 799 dollardan sotilmoqda.

Avvalroq 256 GB xotirali konfiguratsiyani 599 dollarga xarid qilish imkoniyati mavjud edi. M4 Pro chipli Mac mini modellari avvaldan kamida 512 GB xotira bilan taqdim etilgani bois, ularning narxida o'zgarish qayd etilmadi.

Bazaviy modeldagi 256 GB xotira varianti o'tgan haftadan buyon buyurtma uchun yopiq edi, endilikda u kompaniya konfiguratoridan butunlay o'chirildi. Apple bosh direktori Tim Kuk Mac mini va Mac Studio yetkazib berishda cheklovlar mavjudligini tasdiqladi.

Uning qayd etishicha, talab va taklif muvozanatini tiklash uchun kompaniyaga bir necha oy vaqt kerak bo'ladi. Kuk ushbu qurilmalarni sun'iy intellekt hamda agentlik vositalari uchun qulay platforma deb atadi.

Mart oyida Apple Mac Studio modelining 512 GB operativ xotirali variantini ham sotuvdan olgan edi. Konfiguratsiyadagi bunday o'zgarishlar sun'iy intellekt serverlari uchun xotira chiplariga bo'lgan yuqori talab va global tanqislik fonida yuz bermoqda.

Kukning so'zlariga ko'ra, Apple joriy chorakda xotira narxlari oshishini kutmoqda va bu omil kompaniyani murakkab biznes qarorlari qabul qilishga majbur qilmoqda.