Apple arzon Mac mini sotuvini butunlay to'xtatdi

Apple bazaviy Mac mini modelini sotuvdan oldi

Apple kompaniyasi shu haftadan boshlab Mac mini kompyuterining 256 GB xotiraga ega eng arzon talqinini butun dunyo bo'ylab sotishni to'xtatdi. Bu haqda Zamin.uz xabar berdi.

MacRumors nashri xabariga ko'ra, ushbu o'zgarish sababli ish stoli kompyuterining boshlang'ich narxi sezilarli darajada ko'tarildi. Xususan, AQSh bozorida M4 chipli va 16 GB operativ xotiraga ega model endilikda kamida 512 GB xotira bilan 799 dollardan taklif etilmoqda.

Avvalroq 256 GB xotirali bazaviy konfiguratsiyani 599 dollarga sotib olish imkoniyati mavjud edi. M4 Pro chipli Mac mini modellari avvaldan 512 GB xotira bilan chiqarilgani bois, ularning narxida o'zgarish kuzatilmadi.

Kompaniya o'tgan haftadan buyon 256 GB xotirali modellarga buyurtma qabul qilishni cheklagan edi, endilikda esa ushbu variant rasmiy konfiguratordan butunlay o'chirildi. Shuningdek, mart oyida Mac Studio kompyuterining 512 GB operativ xotirali talqini ham sotuvdan olingan edi.

Apple bosh direktori Tim Kuk hisobot yig'ilishida Mac mini va Mac Studio yetkazib berishda cheklovlar borligini tasdiqladi. Kukning so'zlariga ko'ra, sun'iy intellekt va agentlik vositalari uchun ushbu platformalarga talab kutilganidan yuqori bo'lgan.

Talab va taklif muvozanatini tiklash uchun kompaniyaga bir necha oy vaqt kerak bo'ladi. Hozirda sun'iy intellekt serverlari qurilishi sababli global miqyosda xotira chiplari tanqisligi kuzatilmoqda.

Apple rahbari joriy chorakda xotira narxlari sezilarli oshishini va bu holat kompaniyani qiyin iqtisodiy qarorlar qabul qilishga majbur etayotganini ta'kidladi.