O'zbekiston ko'chmas mulk bozorida 2024-yil mart oyida sezilarli o'sish kuzatildi. Iqtisodiy tadqiqotlar va islohotlar markazining ma'lumotlariga ko'ra, shu oyda ro'yxatga olingan uy-joy savdosi bitimlari soni 43,6 mingga yetdi. Bu ko'rsatkich fevral oyidan 47 foizga, o'tgan yilning shu davridan esa ikki baravar yuqoridir.
Mutaxassislar bu o'sishni aprel oyidan boshlab amalda bo'lgan eskrou-hisobvaraqlar orqali to'lov tizimiga o'tilishi bilan bog'lamoqda. Ushbu yangi tizim joriy etilishi oldidan xaridorlar va sotuvchilar bitimlarni tezroq rasmiylashtirishga intilishgan. Eng yuqori o'sish sur'atlari Jizzax viloyatida (73,2 foiz), Sirdaryo viloyatida (64,6 foiz) va Namangan viloyatida (63 foiz) qayd etildi.
Toshkent shahri ham savdo hajmini oshirdi, bu yerda 44 foizlik o'sish bilan 12,8 mingta bitim amalga oshirildi. Ikkilamchi uy-joy bozori narxlari ham barqaror ravishda ko'tarilmoqda. Umumrespublika bo'ylab narxlar oy davomida 0,4 foizga, bir yil davomida esa 10 foizga oshdi.
Sirdaryo va Samarqand viloyatlarida narxlar o'sishi eng yuqori bo'lib, mos ravishda 22 va 18,7 foizni tashkil etdi. Toshkent shahri ikkilamchi bozorida yillik o'sish 5 foizga yetdi, Mirobod, Mirzo Ulug'bek va Chilonzor tumanlarida narxlar saqlanib qolmoqda. Bundan tashqari, ijara bozori ham faollashdi, Toshkent shahrida ijara narxi bir oyda 2,7 foizga oshib, kvadrat metr uchun o'rtacha 8,9 dollarga yetdi. Markaziy tumanlarda esa bu ko'rsatkich 11 dollargacha ko'tarilgan.
