Qozog‘iston prezidenti Qosim-Jomart Tokayev jamiyatda milliy tilning sof holatini saqlab qolish masalasiga alohida to‘xtalib o‘tdi. Bu haqda Zamin.uz xabar berdi.
Davlat rahbari 2026 yil 10 noyabr kuni Ostona shahrida o‘tkazilgan Qazaq tіlі Xalqaro jamiyatining X kurultoyida so‘zlagan nutqida mazkur mavzuni kun tartibiga chiqardi. Prezident o‘z chiqishida fuqarolarni kundalik muomalada qozoq tiliga xos bo‘lgan an’anaviy iboralar o‘rniga arabcha so‘zlar, xususan, inshaalloh va alhamdulillah kabi kalimalarni haddan tashqari ko‘p qo‘llashdan tiyilishga chaqirdi.
Tokayevning qayd etishicha, tildagi bunday sun’iy o‘zgarishlar va arablashuv jarayoni milliy madaniyatning o‘ziga xosliklarini yemirishi mumkin. U nutqi davomida tilning boyligi uning tarixiy ildizlarida ekanligini ta’kidlab, ona tilini asrab-avaylash hamda uning sofligini ta’minlash har bir fuqaroning burchi ekanligini eslatdi.
Davlat rahbarining ushbu tashabbusi mamlakatda til siyosatini tartibga solish va milliy o‘zlikni saqlab qolishga qaratilgan navbatdagi qadam sifatida baholanmoqda. Rasmiy bayonotda tilning madaniy rivojlanishida an’anaviy so‘z boyligidan foydalanish ustuvor ahamiyat kasb etishi kerakligi alohida urg‘ulandi.
Izohlar
0