Moskvada may bayramlari kunlari mobil internet uzilishi kutilmoqda

"Beeline" Moskvada aloqa sifati yomonlashishi haqida ogohlantirdi

"Beeline" aloqa operatori Moskva aholisini 5-maydan 9-maygacha mobil internet va SMS xizmatlarida uzilishlar yuzaga kelishi mumkinligidan xabardor qildi. Bu haqda Zamin.uz xabar berdi.

Bu haqda Ixbt.com nashri ma'lumot tarqatdi. "Moskva 24" nashrining yozishicha, aloqa operatorlari foydalanuvchilarga tegishli xabarnomalarni yuborishga kirishgan.

Xizmat ko'rsatuvchi kompaniya ushbu cheklovlarni bayram tadbirlariga tayyorgarlik ko'rish hamda ularni o'tkazish jarayonida ko'riladigan xavfsizlik choralari bilan izohlagan. Yuzaga kelishi mumkin bo'lgan noqulayliklarning oldini olish maqsadida operator mijozlarga internetga ulanish uchun oldindan Wi-Fi tarmoqlaridan foydalanishni tavsiya qilmoqda.

Hozircha aloqa xizmatlarining to'liq to'xtatilishi emas, balki faqat ehtimoliy vaqtinchalik cheklovlar haqida so'z bormoqda. Mazkur xavfsizlik choralarining aniq tafsilotlari va qamrov doirasi hozircha ochiqlanmagan.

Eslatib o'tamiz, Moskvada may oyi boshida o'tkaziladigan ommaviy tadbirlar munosabati bilan har yili turli texnik cheklovlar joriy etilishi kuzatiladi. Foydalanuvchilardan aloqa tizimidagi kutilmagan o'zgarishlarga tayyor turish so'ralgan.