Dreame kamerasiz modulli smartfon prototipini taqdim etdi

Dreame kompaniyasi Ispaniyada o'tkazilgan maxsus tadbirda Aurora turkumiga kiruvchi smartfonlarning yangi prototiplarini taqdim etdi. Bu haqda Zamin.uz xabar berdi.

Ixbt.com nashrining yozishicha, namoyish etilgan qurilmalar orasida Aurora Nex LS1 texnologik flagmani o'zining noodatiy konsepsiyasi bilan alohida ajralib turadi. Mazkur qurilmaning o'ziga xos jihati shundaki, uning korpusida an'anaviy asosiy kamera mavjud emas.

Buning o'rniga foydalanuvchilar maxsus magnitli biriktirgichlar orqali turli vazifalarni bajaruvchi olinadigan modullarni smartfonga ulashlari mumkin bo'ladi. Ishlab chiqaruvchi ilgariroq kameralar jamlanmasidan iborat tayanch blokni namoyish etgan edi, endilikda esa yanada kengaytirilgan texnologik yechimlar e'lon qilindi.

Taqdim etilgan yangi modullar sirasiga 1 dyuymli sensorga ega 115 millimetrli teleobyektiv hamda alohida harakatli kamera (action camera) kiritilgan. Bundan tashqari, smartfon imkoniyatlarini oshirish uchun ventilyatorli sovutish tizimi va sun'iy yo'ldosh aloqasini ta'minlovchi modullar ham ishlab chiqildi.

Aurora Nex LS1 qurilmasining bozorga chiqarilish muddati va narxi to'g'risida hozircha rasmiy ma'lumot berilmadi.