Dreame Technology kompaniyasi Nebula Next 01 Jet Edition avtomobilini taqdim etdi
Changyutgichlar ishlab chiqarish bilan shug'ullanuvchi Dreame Technology kompaniyasi Nebula Next 01 Jet Edition deb nomlangan noodatiy avtomobil modelini namoyish qildi. Bu haqda Zamin.uz xabar berdi. Ixbt.com nashrining yozishicha, ushbu transport vositasi ikkita qattiq yoqilg'ili raketa tezlatgichi bilan jihozlangan. Mazkur texnologiya yordamida avtomobil soatiga 100 km tezlikka atigi 0,9 soniya ichida erishadi.
Mutaxassislar ushbu loyihani aerokosmik ishlanmalarni oddiy iste'molchilar uchun moslashtirish yo'lidagi dastlabki qadam sifatida baholamoqda. Tizimning maksimal tortish kuchi 100 kilon'yutonga teng bo'lib, xavfsizlik yuqori aniqlikdagi elektron boshqaruv orqali nazorat qilinadi.
Mashina energiya zichligi 450 Vt·soat/kg dan yuqori bo'lgan qattiq holatdagi akkumulyator bilan ta'minlangan. Ishlab chiqaruvchi mazkur texnologiya seriyali ishlab chiqarishga tayyor ekanini va bir marta quvvatlanish orqali 550 km dan ortiq masofani bosib o'tishini ma'lum qildi.
Nebula Next 01 Jet Edition to'liq elektron boshqaruv tizimi bilan jihozlangan bo'lib, u shinalar teshilgan vaziyatda ham murakkab manevrlarni amalga oshirishga qodir. Intellektual haydash jarayonida atrof-muhitni tahlil qiluvchi VLA modellari arxitekturasidan foydalanilgan.
Shuningdek, mashinaga o'rnatilgan DHX1 lidari 600 metr masofadagi ob'ektlarni aniqlay oladi. Tizim 280 metr uzoqlikdagi mayda hayvonlarni ham tanish imkoniyatiga ega bo'lib, bu har qanday ob-havo sharoitida harakat xavfsizligini ta'minlaydi.
