Samsung yetti yildan so'ng daromad bo'yicha TSMC kompaniyasidan o'zib ketdi

Samsung yarimo'tkazgichlar bozorida TSMC kompaniyasini ortda qoldirdi

Samsung Electronics kompaniyasining DS yarimo'tkazgichlar bo'linmasi ko'p yillik tanaffusdan so'ng daromad va operatsion foyda ko'rsatkichlari bo'yicha TSMC ustidan g'alaba qozondi. Bu haqda Zamin.uz xabar berdi.

Bozor tahlilchilarining qayd etishicha, xotira chiplariga bo'lgan ehtiyojning ortishi va narxlarning ko'tarilishi Janubiy Koreya gigantining moliyaviy holati yaxshilanishiga xizmat qilgan. Ixbt.com nashri bergan ma'lumotga ko'ra, Samsung so'nggi 29 chorak yoki yetti yildan ortiq davom etgan raqobatda birinchi marta asosiy raqibidan o'zib ketishga muvaffaq bo'ldi.

Joriy yilning birinchi choragi yakunlariga ko'ra, kompaniyaning yarimo'tkazgichlar yo'nalishidagi daromadi TSMC ko'rsatkichidan 19,3 mlrd dollarga ko'proqni tashkil etdi. Shu bilan birga, operatsion foyda hajmi ham raqobatchinikidan 15,4 mlrd dollarga yuqori bo'lgani aniqlandi.

Ta'kidlash joizki, ushbu ikki texnologik gigant turli yo'nalishlarga ixtisoslashgan: Tayvanning TSMC kompaniyasi asosan murakkab hisoblash chiplari ishlab chiqarsa, Samsung korporatsiyasi turli xil xotira qurilmalarini tayyorlashda yetakchilik qiladi. Moliyaviy ko'rsatkichlarning bunday o'zgarishi jahon yarimo'tkazgichlar bozoridagi talabning yangi bosqichga chiqqanidan dalolat beradi.