"Yuventus" "Bavariya" himoyachisi Kim Min Je uchun asosiy da'vogar bo'lib turibdi

Myunxenning "Bavariya" klubi markaziy himoyachisi Kim Min Je Italiya chempionati grandlari e’tiborida qolmoqda. Bu haqda Euro-football.ru xabar berdi.

Janubiy koreyalik futbolchining xizmatlariga ayniqsa Turinning "Yuventus" klubi jiddiy qiziqish bildirmoqda. Bu haqda taniqli insayder Fabrisio Romano ma’lum qildi.

Xabarlarga ko‘ra, 29 yoshli futbolchining transferi bo‘yicha asosiy to‘siq uning yuqori maoshi bo‘lib qolmoqda. Hozirgi vaqtda Italiyaning hech bir yetakchi klubi himoyachining Myunxendagi oylik maoshini to‘liq qoplash imkoniyatiga ega emas.

Shu sababli, transfer amalga oshishi uchun Kim Min Je o‘z maoshining sezilarli qismidan voz kechishiga to‘g‘ri keladi. "Bavariya" rahbariyati kelasi yozgi transfer oynasida koreyalik himoyachi bo‘yicha kelib tushadigan takliflarni ko‘rib chiqishga tayyorligini bildirgan.

Ma’lumot uchun, Kim Min Je 2023-yilning yozida "Napoli" safidan Myunxen klubiga o‘tgan edi. "Transfermarkt" portali ayni damda futbolchining bozor qiymatini 25 mln yevroga baholamoqda.

Uning amaldagi klubi bilan shartnomasi 2028-yilga qadar mo‘ljallangan.