Asalarilar uyasida diniy yozuvni eslatuvchi shakl hosil bo'ldi

O'zbekistonda asalarilar uyasida arab yozuviga o'xshash shakllar paydo bo'ldi

Ijtimoiy tarmoqlarda asalarichilik bilan shug'ullanuvchi Shohro'z ismli fuqaro tomonidan tasvirga olingan video keng muhokama qilinmoqda. Bu haqda Zamin.uz xabar berdi.

Asalarichi o'z parvarishidagi uyalardan birini ko'zdan kechirayotgan vaqtda asalari mumidan hosil bo'lgan noodatiy tuzilishga duch keldi. Ma'lum qilinishicha, bloger so'roviga ko'ra o'tkazilgan tekshiruv davomida ramkadagi mum qatlamlari "Alloh" so'ziga juda o'xshash shaklni hosil qilgani aniqlangan.

Videotasvirlarda tabiiy yo'l bilan shakllangan mum kompozitsiyasining aniq harflar ko'rinishida joylashgani aks etgan. Ushbu holat foydalanuvchilar orasida turlicha talqin qilinmoqda: ayrimlar buni tabiatning noyob hodisasi deb baholasa, boshqalar tasodifiy geometrik shakl deb hisoblamoqda.

Mutaxassislarning tushuntirishicha, asalarilar uya ichidagi muhit, ramka joylashuvi yoki harakatlanish xususiyatlaridan kelib chiqib, har xil shakllar yasashi mumkin, biroq yozuvni eslatuvchi bunday holatlar kam uchraydi. Shohro'z ushbu manzarani kutilmagan hodisa deb atadi va asalarichilik faoliyati davomida bunday holatga ilk bor guvoh bo'lganini ta'kidladi.

U o'z topilmasini Toshkent shahridagi Islom sivilizatsiyasi markaziga topshirish niyatida ekanini bildirdi. Mazkur eksponat muzey orqali keng jamoatchilik e'tiboriga havola etilishi rejalashtirilmoqda.

Tabiatning ushbu kutilmagan hodisasi ko'plab kuzatuvchilarda katta qiziqish uyg'otishda davom etmoqda.