Rossiya VK Video loyihasiga 43 mlrd rubldan ortiq mablag' ajratdi

Rossiya milliy video platforma va messenjer loyihalari uchun 43,5 mlrd rubl ajratdi

Rossiya Raqamli rivojlanish vazirligi 2025 yilda milliy video platformani shakllantirish va takomillashtirish maqsadida 39,5 mlrd rubldan ortiq mablag' yo'naltirdi. Bu haqda Zamin.uz xabar berdi.

Shuningdek, ko'p funksiyali ma'lumot almashish xizmatini yo'lga qo'yish uchun yana 4 mlrd rubldan ziyod mablag' ajratilgan. Bu haqda Ixbt.com nashri ma'lum qildi.

Har ikkala loyiha bevosita "VK" kompaniyalar guruhi faoliyati bilan bog'liq. "Kommersant" nashri manbalarining tasdiqlashicha, davlat tomonidan moliyalashtirilayotgan milliy video platforma amalda "VK Video" xizmati hisoblanadi.

Mazkur mablag'lar "Yagona video" tuzilmasi orqali taqdim etilgan bo'lib, ushbu maydoncha endilikda davlat ishtirokidagi alohida loyiha maqomini olgan. Yangi ma'lumot almashish xizmati esa "Max" messenjeri negizida yaratilishi kutilmoqda.

Rossiyada bunday turdagi xizmatlarni tashkil etish bo'yicha qonuniy asoslar 2025 yil iyun oyida kuchga kirgan edi. IT sohasi mutaxassislarining tushuntirishicha, loyihalar o'rtasidagi moliyaviy farq video platformaning texnik murakkabligi bilan bog'liq.

Bunday tizimni rivojlantirish uchun keng ko'lamli infratuzilma, server quvvatlarini oshirish va zamonaviy reklama mexanizmlarini joriy etish talab etiladi.