O'zbekistonda hafta o'rtasida havo harorati 38 darajagacha ko'tariladi

O'zbekistonda ob-havo keskin isishi kutilmoqda

Bahorning so'nggi oyi mamlakatda beqaror ob-havo sharoitlari bilan davom etmoqda. Bu haqda Zamin.uz xabar berdi.

Gidrometeorologiya xizmati agentligi ma'lumotlariga ko'ra, hafta boshidagi namlik o'rnini tez orada jazirama issiq egallaydi. Haftaning ilk kunida respublikaning markaziy va sharqiy hududlarida beqarorlik saqlanib qoladi.

Toshkent, Samarqand, Jizzax, Sirdaryo viloyatlari hamda Farg'ona vodiysida kunning ikkinchi yarmida momaqaldiroq bo'lishi va qisqa muddatli yomg'ir yog'ishi prognoz qilinmoqda. Ushbu hududlarda harorat +23…+26 daraja atrofida bo'ladi.

Shimoliy va janubiy viloyatlarda esa yog'ingarchilik kutilmaydi, havo +32 darajagacha isiydi. 5-maydan 7-maygacha bo'lgan muddatda O'zbekistonning katta qismida ochiq va quyoshli ob-havo hukm suradi.

Faqat Qoraqalpog'iston va Xorazmda biroz yomg'ir yog'ishi ehtimoli bor. Mazkur kunlarda harorat kunduzi +32…+35 darajagacha, janubiy hududlarda esa +38 darajagacha ko'tariladi.

Kechasi harorat +17…+20 daraja atrofida bo'ladi. 8-may kuni respublikaning aksariyat hududlarida yana yomg'ir yog'ishi mumkin.

6–8-may kunlari shamol tezligi soniyasiga 13–18 metrgacha kuchayishi, ayrim joylarda chang-to'zonlar ko'tarilishi kutilmoqda. Tog'li hududlarda 4–5 va 8-may kunlari kuchli yomg'ir yog'ishi sababli sel-suv toshqinlari yuzaga kelishi xavfi mavjud.

Toshkent shahrida dushanba kuni harorat +24…+26 daraja bo'ladi. Seshanbadan boshlab poytaxtda ham issiq kuchayib, havo harorati +35 darajagacha ko'tarilishi ma'lum qilindi.

8-may kuni shaharda shamol kuchayishi va chang kuzatilishi ehtimoli bor.