So‘nggi qo‘ng‘iroq kuni hududlarda qanday ob-havo kuzatiladi

O‘zgidromet xizmati agentligi 25 may kuni maktablarda o‘tkaziladigan So‘nggi qo‘ng‘iroq tadbirlari uchun meteorologik prognozni taqdim etdi. Bu haqda Zamin.uz xabar berdi.

Respublikaning ayrim hududlarida yog‘ingarchilik kuzatilishi, tog‘li zonalarda esa sel-suv toshqinlari xavfi saqlanib qolishi kutilmoqda. Toshkent shahrida havo o‘zgaruvchan bo‘lib, qisqa muddatli yomg‘ir yog‘ishi hamda momaqaldiroq bo‘lishi ehtimoli bor.

Harorat kechasi 15-17, kunduzi 26-28 daraja atrofida bo‘ladi. Toshkent viloyatida ham ayrim hududlarda yomg‘ir yog‘ishi kutilmoqda, harorat kechasi 13-18, kunduzi 25-30 darajani tashkil etadi.

Qoraqalpog‘iston Respublikasi va Xorazm viloyatida yog‘ingarchilik kutilmaydi, ammo ayrim hududlarda shamol kuchayishi va chang-to‘zonlar kuzatilishi mumkin. Bu hududlarda havo harorati kechasi 13-18, kunduzi 28-33 daraja bo‘ladi.

Buxoro va Navoiy viloyatlarida quruq hamda o‘zgaruvchan havo sharoiti saqlanib qoladi, harorat kechasi 15-20, kunduzi 28-33 darajagacha ko‘tariladi. Sirdaryo, Jizzax va Samarqand viloyatlarida yog‘ingarchilik kutilmaydi.

Harorat kechasi 13-18, kunduzi 25-30 daraja bo‘lishi prognoz qilinmoqda. Qashqadaryo va Surxondaryo viloyatlarida nisbatan issiq ob-havo hukm suradi, kunduzgi harorat 30-35 darajagacha yetadi.

Farg‘ona vodiysi viloyatlarida esa ayrim joylarda yomg‘ir yog‘ishi mumkin, harorat kechasi 13-18, kunduzi 25-30 daraja bo‘ladi. Tog‘li va tog‘oldi hududlarda vaqti-vaqti bilan yomg‘ir yog‘adi, ayrim joylarda kuchli bo‘lishi, momaqaldiroq va do‘l yog‘ishi ehtimoli bor.

Mazkur hududlarda sel-suv toshqinlari xavfi saqlanib qoladi, harorat kechasi 8-13, kunduzi 15-20 daraja atrofida bo‘ladi.