O'zbekistonning aksariyat hududlarida 27 aprel kuni yog'ingarchiliksiz ob-havo kuzatiladi
O'zgidromet xizmati mamlakat hududlarida 27 aprel kuni kutilayotgan ob-havo prognozini e'lon qildi. Bu haqda Zamin.uz xabar berdi. Ma'lumotlarga ko'ra, respublikaning katta qismida havo o'zgaruvchan bo'ladi, biroq yog'ingarchilik kutilmaydi. Faqat tog'oldi va tog'li hududlarda vaqti-vaqti bilan yomg'ir yog'ishi ehtimoli bor.
Tog'li joylarda harorat kechasi 5-10 daraja, kunduzi 17-22 daraja iliq bo'lishi ma'lum qilindi. Toshkent shahrida havo o'zgarib turadi, yog'ingarchilik kuzatilmaydi.
Poytaxtda sharqiy yo'nalishdagi shamol 3-8 m/s tezlikda esishi kutilmoqda. Harorat kechasi 13-15 daraja, kunduzi esa 26-28 daraja atrofida bo'ladi.
Farg'ona vodiysi viloyatlarida ham shunday harorat tartibi saqlanib, kunduzi havo 31 darajagacha isiydi. Qoraqalpog'iston, Xorazm, Buxoro va Navoiy viloyatlarida shamol tezligi 15-20 m/s gacha kuchayishi natijasida chang-to'zonlar va qum bo'ronlari kuzatilishi mumkin.
Buxoro va Navoiyning ayrim hududlarida kunduzgi harorat 33 darajagacha ko'tariladi. Sirdaryo, Jizzax va Samarqand viloyatlarida ham shamol kuchayishi ehtimoli bor, kunduzi harorat 26-31 daraja bo'ladi.
Eng issiq ob-havo mamlakatning janubiy hududlarida qayd etiladi. Qashqadaryo va Surxondaryo viloyatlarida kunduzi havo harorati 35 darajagacha ko'tarilishi prognoz qilinmoqda.
Ushbu hududlarda ham sharqiy shamol 13-18 m/s tezlikda esib, changli bo'ronlar yuzaga kelishi mumkin.
