O'zbekistonda 1 100 nafar xonanda daromadlari to'g'risida deklaratsiya topshirdi

O'zbekistonda 1 100 nafar xonanda daromadlari to'g'risida deklaratsiya topshirdi

Soliq qo'mitasi 2025 yil boshidan 1 mayga qadar bo'lgan davr uchun san'atkorlar tomonidan taqdim etilgan hisobotlar natijasini e'lon qildi. Bu haqda Zamin.uz xabar berdi.

Mazkur vaqt oralig'ida litsenziyaga ega 1 100 nafar ijodkor jami 6 mlrd 478 mln so'm miqdorida daromad ko'rganini ma'lum qilgan. Ushbu mablag'ning 5,1 mlrd so'mi soliqqa tortiladigan baza sifatida belgilandi va yakunda 599,7 mln so'm daromad solig'i hisoblandi.

Xonandalar tushumlari hajmiga ko'ra uchta asosiy toifaga ajratilgan. Birinchi guruhga mansub 47 nafar ijodkor 1,5 mlrd so'm daromad bildirgan bo'lib, ulardan 140,8 mln so'm soliq undirilishi belgilandi.

Ikkinchi toifadagi 100 nafar san'atkor 901,4 mln so'm tushum ko'rsatgan va 83,9 mln so'm miqdorida soliqqa tortilgan. Eng ko'p sonli uchinchi guruhdagi 953 nafar xonanda esa 4,1 mlrd so'm daromad qayd etgan.

Ularning hisobiga 375,2 mln so'm soliq to'lovi yozilgan. Deklaratsiyalardagi daromadlar miqdori turlicha taqsimlangan.

Xususan, 375 nafar ijodkor yillik daromadi 1 mln so'mdan oshmasligini bildirgan. Yana 576 ta holatda tushumlar 10 mln so'mgacha ekani qayd etilgan.

Faqat 7 nafar san'atkor yillik daromadini 152 mln so'mgacha deb ko'rsatib, eng yuqori ko'rsatkichni qayd etgan. Mazkur shaxslar uchun o'rtacha soliq to'lovi 10,7 mln so'mni tashkil etmoqda.

Belgilangan tartibga ko'ra, deklaratsiya topshirgan barcha ijodkorlar hisoblangan soliqlarni 2026 yil 1 iyunga qadar to'lab berishlari shart. Shu bilan birga, 2026 yil 1 sentyabrdan boshlab soha vakillari uchun yangi soliqqa tortish tizimi joriy etilishi kutilmoqda.

Adliya vazirligi tomonidan muhokamaga qo'yilgan ushbu loyiha ijtimoiy tarmoqlarda keng bahslarga sabab bo'ldi. Ayrim san'atkorlar qo'shimcha to'lovlarga e'tiroz bildirgan bo'lsa, madaniyat vaziri Ozodbek Nazarbekov barchani soliq majburiyatlarini bajarishga chaqirdi.