O'zbekistonda o'rtacha oylik ish haqi 6,8 mln so'mdan oshdi

O'zbekistonda o'rtacha oylik ish haqi 6,8 mln so'mdan oshdi

2026 yilning birinchi choragi yakunlari bo'yicha O'zbekistonda o'rtacha oylik nominal ish haqi miqdori ma'lum qilindi. Bu haqda Zamin.uz xabar berdi.

Statistika ma'lumotlariga ko'ra, respublika bo'yicha o'rtacha ko'rsatkich 6 825,9 ming so'mga yetgan. Biroq iqtisodiyotning turli tarmoqlarida mehnatga haq to'lash darajasi bir-biridan sezilarli darajada farq qilishi kuzatilmoqda.

Moliya va axborot texnologiyalari sohalari daromad miqdori bo'yicha yetakchilikni saqlab qolmoqda. Moliya va sug'urta yo'nalishida faoliyat yuritayotgan bank hamda kredit tashkilotlari xodimlari o'rtacha 18 595,8 ming so'm maosh bilan eng yuqori ko'rsatkichni qayd etdi.

Axborot va aloqa texnologiyalari mutaxassislarining o'rtacha oylik daromadi esa 16 525,4 ming so'mni tashkil etdi. Real sektor tarmoqlarida daromadlar respublika o'rtacha ko'rsatkichidan yuqori yoki unga yaqin darajada shakllangan.

Transport va saqlash sohasida ish haqi 10 709,3 ming so'm, sanoat korxonalarida 8 025,6 ming so'm, savdoda 7,2 mln so'm hamda qurilish tarmog'ida 6,5 mln so'm miqdorida belgilangan. Xizmat ko'rsatish, san'at va umumiy ovqatlanish sohalarida oylik maoshlar nisbatan pastroq bo'lib, o'rtacha 5,3 mln so'm atrofida qayd etilgan.

Eng kam ish haqi ko'rsatkichlari ijtimoiy sohalarda kuzatilmoqda. Xususan, ta'lim tizimi xodimlari o'rtacha 4 615,9 ming so'm, sog'liqni saqlash va ijtimoiy xizmat ko'rsatish sohasi vakillari esa 4 111,6 ming so'm maosh olmoqdalar.

Ushbu raqamlar ijtimoiy ahamiyatga ega sohalarda moddiy rag'batlantirish darajasi hamon pastligicha qolayotganini ko'rsatadi.