Barchin G'ofurova hayotidagi og'ir sinovlar va muvaffaqiyat yo'li haqida gapirdi

Barchin G'ofurova: «Baxt ovchisi» seriali yulduzining hayotiy qiyinchiliklari va ijodiy yo'li

«Baxt ovchisi» serialidagi Zulya obrazi bilan tanilgan aktrisa va teleboshlovchi Barchin G'ofurova o'zining murakkab o'tmishi va bugungi hayoti haqida ma'lumot berdi. Bu haqda Zamin.uz xabar berdi.

Asl ismi Umida bo'lgan ijodkor bolaligida otasi oilasini tark etgani sababli ruhiy jarohat olganini, bu holat hanuz unga ta'sir o'tkazishini bildirdi. Aktrisaning hayot yo'li onasining onkologik xastalikka chalinishi, shaxsiy munosabatlardagi firibgarliklar va tashqi ko'rinishi tufayli bildirilgan haqoratlar bilan kechgan.

Hatto salbiy rollari sababli ayrim tomoshabinlar tomonidan unga nisbatan tahdidlar ham bo'lgan. 1990 yil Toshkent shahrida tug'ilgan G'ofurovaning yoshligi Qashqadaryo viloyatining Qarshi shahrida o'tgan.

U bolaligida raqqosa bo'lishni istagan bo'lsa-da, oilasining qarshiligi tufayli aktyorlik sohasini tanlagan. O'zbekiston davlat san'at va madaniyat institutiga o'qishga kirgan aktrisa moddiy yetishmovchilik sababli bir muddat o'qishdan chetlatilgan, biroq keyingi yili davlat granti asosida qayta qabul qilingan.

Talabalik yillarida ijara uylarda yashab, kafeda ofitsiant bo'lib ishlashga majbur bo'lganini eslaydi. Uning so'zlariga ko'ra, ukasining Pragadagi muolajalari uchun oilasi bor budini sarflagan.

Aktrisaga katta mashhurlik keltirgan «Baxt ovchisi» serialidagi Zulya roli uning moliyaviy ahvoli o'ta og'irlashgan davrda taqdim etilgan. Syomka jarayonlarida onasiga saraton tashxisi qo'yilishi vaziyatni yanada murakkablashtirgan.

Davolanish xarajatlari sababli gonorar miqdorini oshirishni so'rashiga to'g'ri kelgan. Shuningdek, ijtimoiy tarmoqlardagi tanqidlar va ruhiy tushkunlik sababli oshqozonni kichraytirish amaliyotini o'tkazgan hamda ismini Umidadan Barchinga o'zgartirgan.

Shaxsiy hayotida ham ko'p aldanganini ta'kidlagan aktrisa, sobiq sevgan insoni uning ishonchidan foydalanib, onasining xastaligi nomidan pul yig'ganini ma'lum qildi. Hozirda 36 yoshni qarshi olgan G'ofurova onasi bilan ijara uyda yashashi va hayotda faqat o'ziga tayanishini ta'kidladi.

Uzoq yillik ayriliqdan so'ng otasi bilan aloqalari tiklanganini aytgan aktrisa, bugungi kunda moddiy barqarorlikka o'z mehnati bilan erishganini ma'lum qildi.