Toshkentda qizlarni xorijga noqonuniy yuborish bilan shug'ullangan ayol ushlandi
Toshkent xalqaro aeroportida odam savdosi bilan bog'liq jinoiy harakatlarga chek qo'yildi. Bu haqda Zamin.uz xabar berdi. Davlat xavfsizlik xizmati hamda ichki ishlar organlari xodimlari hamkorligida o'tkazilgan tezkor tadbir natijasida qizlarni chet elga fohishalik uchun yubormoqchi bo'lgan ayol qo'lga olindi. Aniqlanishicha, gumonlanuvchi jinoiy guruh tarkibida faoliyat yuritib, yosh ayollarni aldov yo'li bilan yollash va ularni xorijda jinsiy ekspluatatsiya qilish bilan shug'ullanib kelgan.
Huquqni muhofaza qiluvchi organlar xodimlari ayolni 4 nafar qizdan birini Dubay shahriga olib ketayotgan vaqtida to'xtatib qolgan. Mazkur holat yuzasidan gumonlanuvchiga nisbatan Jinoyat kodeksining 135-moddasi (odam savdosi) bilan jinoyat ishi qo'zg'atildi.
Hozirda sud qarori bilan unga nisbatan qamoq ehtiyot chorasi qo'llanilgan bo'lib, tergov harakatlari olib borilmoqda. O'zbekiston qonunchiligiga ko'ra, ushbu turdagi jinoyatlarni sodir etgan shaxslar 5 yildan 10 yilgacha muddatga ozodlikdan mahrum qilinishi mumkin.
