Gari Keyn: «Bavariya» o'z xarakterini ko'rsata oldi» Myunxenning «Bavariya» klubi markaziy hujumchisi Gari Keyn Germaniya chempionatining 31-turi doirasida «Mayns»ga qarshi kechgan safar o'yinidan so'ng o'z fikrlari bilan o'rtoqlashdi. Bu haqda Euro-football.ru xabar berdi.
Mazkur bahsda myunxenliklar 0:3 hisobida mag'lubiyatga uchrayotgan bo'lishiga qaramay, ikkinchi bo'limda irodali g'alabani qo'lga kiritdi va uchrashuv 4:3 hisobida yakunlandi. Angliyalik hujumchining ta'kidlashicha, uchrashuvning birinchi bo'limi jamoa uchun kutilganidan ancha murakkab kechgan.
Keyn jamoa o'zining odatiy darajasidagi o'yinni namoyish eta olmaganini, ayniqsa, himoya chizig'ida ko'plab xatolarga yo'l qo'yilganini e'tirof etdi. Shuningdek, «Bavariya» futbolchilari to'p bilan muomala qilishda beparvolikka yo'l qo'ygani sababli raqib jamoa ushbu imkoniyatlardan samarali foydalangan.
«Tanaffusdan so'ng biz o'yin tempini oshirishga qaror qildik va bor kuchimiz bilan harakat qildik. Yakuniy natija jamoamiz qanday xarakterga ega ekanligini isbotlab turibdi», — deya Keynning so'zlarini keltirmoqda klub matbuot xizmati.
Eslatib o'tamiz, «Bavariya» joriy mavsumda muddatidan avval Germaniya chempionligini rasmiylashtirib bo'lgan. Gari Keyn jamoaning ushbu muvaffaqiyatiga munosib hissa qo'shib kelmoqda.
