SpaceX koinotda bir millionta ma’lumotlar markazi qurishni rejalashtirmoqda

Investorlar orbital ma'lumotlar markazlarini rivojlantirish loyihalariga qiziqish bildirmoqda

Global investitsiya bozorida orbital ma'lumotlar markazlarini tashkil etish bilan bog'liq loyihalarga e'tibor kuchaymoqda. Bu haqda Zamin.uz xabar berdi.

Garchi ushbu tizimlar istiqboldagi rejalar sirasiga kirsa-da, sohaga bo'lgan qiziqish barqaror o'sib bormoqda. Ixbt.com nashrining ma'lum qilishicha, "Founders Fund" venchur fondi hamkori Delyan Asparuxov Vashingtonda o'tgan tadbirda ushbu yo'nalishdagi rejalar bilan o'rtoqlashdi.

Asparuxov o'z nutqida "SpaceX" bilan to'g'ridan-to'g'ri raqobatga kirishmasligini, aksincha, Yerdagi sun'iy intellekt hisoblash jarayonlariga xizmat qiluvchi infratuzilma biznesiga e'tibor qaratishini ta'kidladi. "Varda Space Industries" hammuassisi hisoblangan Asparuxov ilgari koinotda joylashgan markazlar g'oyasiga nisbatan shubha bildirganini tan oldi.

Biroq kelgusi o'n yillikda kosmik parvozlar narxi pasayishi va texnologik taraqqiyot ushbu modelni amalga oshirish imkonini beradi. AQShda yer usti ma'lumotlar markazlariga nisbatan yuzaga kelayotgan siyosiy bosim va jamoatchilik e'tirozlari ham sun'iy yo'ldoshlar orqali ishlashga turtki bo'lmoqda.

Bunday ijtimoiy kayfiyat yerda yangi ob'ektlar qurilishini cheklab qo'yishi mumkin. Hozirda "SpaceX" kompaniyasi orbitada bir milliongacha ma'lumotlar markazini joylashtirish bo'yicha eng yirik tashabbusni ilgari surmoqda.

Mazkur ob'ektlar dastlab "xAI" va "Tesla" korxonalarining ichki hisoblash ehtiyojlarini qondirishga xizmat qiladi. Shuningdek, "Starcloud" startapi tashqi mijozlar uchun 88 mingta shunday ob'ekt yaratish maqsadida tegishli ruxsatnomani kutmoqda.

"Founders Fund" hozircha ushbu loyihalarga yirik mablag' ajratmagan bo'lsa-da, yangi infratuzilmaga talab ortishi bilan sarmoya kiritish masalasi ko'rib chiqiladi.