Daniyada sun'iy intellekt sabab ma'lumotlar markazlariga cheklov qo'yildi

Daniya ma'lumotlar markazlarini elektr tarmog'iga ulashni vaqtincha to'xtatdi

Daniya hukumati yangi ma'lumotlar markazlarini umumiy elektr tarmoqlariga ulash bo'yicha shartnomalar imzolashga moratoriy e'lon qildi. Bu haqda Zamin.uz xabar berdi.

Mazkur qarorga infratuzilma imkoniyatlaridan bir necha barobar yuqori bo'lgan arizalar sonining keskin ortib ketgani sabab bo'lgan. "Energinet" davlat operatori hisobotiga ko'ra, hozirda navbatda turgan loyihalarning umumiy quvvati 60 gigavattga yetgan.

Taqqoslash uchun, butun Daniya bo'ylab elektr energiyasi iste'molining eng yuqori ko'rsatkichi bor-yo'g'i 7 gigavattni tashkil etadi. Mavjud arizalarning 25 foizi aynan ma'lumotlarni qayta ishlash markazlari hissasiga to'g'ri kelmoqda.

Sun'iy intellekt texnologiyalari rivojlanishi ortidan yuzaga kelgan yuqori talab hukumatni energiya taqsimoti borasidagi ustuvor vazifalarni qayta ko'rib chiqishga undadi. Mutaxassislar Daniyadagi ushbu holat butun Yevropa uchun o'ziga xos signal bo'lishini ta'kidlamoqda.

Endilikda hukumatlar sun'iy intellekt sohasiga kiritilayotgan investitsiyalardan keladigan iqtisodiy foyda hamda energetika xavfsizligi o'rtasida muvozanat topishga majbur bo'ladi. Ma'lumotlar markazlari tufayli energiya tizimlariga tushayotgan bosim global muammoga aylanmoqda.

Xususan, AQShning Men shtatida yangi markazlar qurilishini taqiqlash choralari ko'rilmoqda, Virjiniya va Oklaxomada esa shunga o'xshash cheklovlar muhokama qilinmoqda.