SpaceX orbitadan yuklarni qaytaruvchi yangi kapsula loyihasini boshladi

AQSH Federal aviatsiya boshqarmasi SpaceX kompaniyasining Starfall deb nomlangan maxfiy loyihasi yuzasidan yangi ma’lumotlarni taqdim etdi. Bu haqda Zamin.uz xabar berdi.

Ixbt.com manbasiga asoslanib xabar qilinishicha, ushbu tashabbus orbitadagi yuklarni Yerga xavfsiz qaytarishga mo‘ljallangan ko‘p marta foydalaniladigan kosmik kapsulani yaratishni ko‘zda tutadi. Kelgusida ushbu texnologiya koinotda ilmiy tajribalar o‘tkazish, turli materiallar ishlab chiqarish va sayyoramizning istalgan nuqtasiga tezkor yuk yetkazib berish tizimini shakllantirishda muhim ahamiyat kasb etadi.

FAA hujjatlarida ta’kidlanishicha, Starfall loyihasi disk ko‘rinishidagi uchuvchisiz kapsuladan iborat bo‘lib, u tashqi tuzilishi jihatidan uchar likopchani eslatadi. Uni koinotga Falcon 9 hamda Starship raketalari orqali olib chiqish rejalashtirilgan.

Orbitaga yetgach, apparat mikrogravitatsiya sharoitida o‘z vazifalarini bajaradi va yakunda yuk bilan birga Yerga qaytadi. SpaceX mazkur kapsulani qaytariladigan apparatlar turkumining asosiy bo‘g‘ini sifatida baholamoqda.

Taxminlarga ko‘ra, qurilma 1 tonnagacha bo‘lgan yukni orbitaga yetkazish va qaytarib olib tushish quvvatiga ega bo‘ladi. Dastlabki sinov parvozlari Tinch okeani hududida, Kaliforniya va Meksika qirg‘oqlaridan 1300 kilometr uzoqlikda o‘tkazilishi belgilangan.

Atmosferaga kirgandan so‘ng, kapsula parashyutlar yordamida tormozlanib, okean yuzasiga qo‘nadi. SpaceX mutaxassislari qurilmani maxsus kemalar orqali yig‘ib olib, uni tahlil qilish va qayta foydalanishni rejalashtirgan.

Loyihaning muvaffaqiyati SpaceX kompaniyasiga Varda Space Industries, Inversion va Atmos Space Cargo kabi raqobatchilar faoliyat yuritayotgan qaytariladigan orbital platformalar bozorida yetakchi o‘rinni egallash imkonini beradi. Ayni damda ushbu startaplar koinotda mahsulot ishlab chiqarish va uni Yerga yetkazib berish texnologiyalarini rivojlantirish ustida faol ish olib bormoqda.