Oy orbitasidagi Gateway va Axiom Space stansiyalari modullarida nuqsonlar aniqlandi
Oy orbitasida barpo etilishi kutilayotgan Gateway hamda Axiom Space tijoriy stansiyalarining asosiy qismlarida texnik muammolar qayd etildi. Bu haqda Zamin.uz xabar berdi. Xususan, Northrop Grumman kompaniyasi ishlab chiqayotgan HALO hamda Yevropa kosmik agentligiga tegishli I-Hab modullarida korroziya alomatlari aniqlangan. Ushbu ma'lumotni Ixbt.com nashri e'lon qildi.
NASA vakili Jared Ayzekman AQSh Kongressidagi eshituvlar davomida mazkur nosozliklar loyiha muddatlari kechikishiga va xarajatlar ortishiga sabab bo'lishi mumkinligini bildirdi. Hozirda Northrop Grumman mutaxassislari NASA bilan hamkorlikda ta'mirlash ishlarini boshlagan.
Ma'lum bo'lishicha, muammolar Thales Alenia Space kompaniyasi yetkazib bergan germetik bo'lmalarda yuzaga kelgan. Yevropa kosmik agentligi korroziya sabablarini tahlil qilish uchun maxsus ishchi guruhini shakllantirdi.
Dastlabki o'rganishlar nuqsonlar ishlab chiqarish texnologiyasi va materiallar sifati bilan bog'liqligini ko'rsatmoqda. Shunga qaramay, ekspertlar nosozliklarni bartaraf etish imkoniyati borligini va ular missiya xavfsizligiga jiddiy tahdid solmasligini ta'kidlamoqda.
Axiom Space stansiyasining ilk modulini koinotga uchirish rejasi o'zgarishsiz qoldi — jarayon 2028 yilga mo'ljallangan.
