Lenovo yangi ThinkPad P16 noutbuklarida magniy karkasdan voz kechdi

Lenovo ThinkPad P16 Gen 3 ish stansiyasi konstruksiyasini o'zgartirdi

Lenovo kompaniyasi o'zining flagman qurilmasi hisoblangan ThinkPad P16 Gen 3 ish stansiyasi tuzilishiga muhim o'zgarishlar kiritdi. Bu haqda Zamin.uz xabar berdi.

Yangi modelda korpus mustahkamligini ta'minlab kelgan ichki magniy karkasdan voz kechildi. Bu haqda Ixbt.com nashri ma'lumot berdi.

Ushbu qaror bilan kompaniya 2006 yilda ThinkPad T60 modelida joriy etilgan va qariyb yigirma yil davom etgan an'anani to'xtatdi. Magniy karkas uzoq vaqt davomida ThinkPad P seriyasining asosiy belgisi bo'lib, noutbukning chidamliligini oshirishga va professional foydalanishdagi og'ir yuklamalarga bardosh berishga xizmat qilgan.

Murakkab sharoitlarda ishlaydigan mobil ish stansiyalari uchun bunday himoya darajasi o'ta muhim hisoblanardi. Hozirda Lenovo qurilma qalinligi va umumiy o'lchamlarini ixchamlashtirish strategiyasini tanlagan.

P16 Gen 3 modelida ekran atrofidagi qo'shimcha magniy ramka o'rniga bevosita asosiy korpusga integratsiya qilingan konstruksiya qo'llanildi. Kompaniya mazkur o'zgarishning aniq sabablarini ochiqlamagan bo'lsa-da, bu ishlab chiqarish jarayonini soddalashtirishi taxmin qilinmoqda.

ThinkPad P seriyasi bozordagi eng qimmat noutbuklar qatorida qolmoqda. P16 Gen 3 modelining asosiy komplektatsiyasi taxminan 3 000 AQSh dollaridan boshlanadi.

Intel Core Ultra 9 275HX protsessori va Nvidia RTX Pro 5000 Blackwell grafik kartasi bilan jihozlangan eng yuqori konfiguratsiya narxi esa 9 500 AQSh dollari atrofida baholandi.