Mirziyoyev Farg'onadagi Investorlarga xizmat ko'rsatish markazi faoliyati bilan tanishdi
Prezident Shavkat Mirziyoyev Farg'ona shahriga xizmat safari doirasida hududda yangi tashkil etilgan Investorlarga xizmat ko'rsatish markaziga tashrif buyurdi. Bu haqda Zamin.uz xabar berdi. Mazkur majmua viloyatning iqtisodiy salohiyatini oshirish hamda sarmoyadorlar uchun qulay ishchi muhitini yaratish maqsadida barpo etilgan. Markaz tarkibidagi «Farg'ona ekspo» xalqaro ko'rgazmalar majmuasi ishlab chiqaruvchilar o'rtasida kooperatsiya aloqalarini yo'lga qo'yish va eksport imkoniyatlarini kengaytirishga xizmat qiladi.
Umumiy maydoni 5 gektarni egallagan ushbu markazda 200 dan ortiq mahalliy korxonalar o'z mahsulotlarini namoyish etmoqda. Sakkiz qavatli zamonaviy binoning quyi qavatlarida tadbirkorlikni qo'llab-quvvatlash tuzilmalari joylashgan bo'lib, yuqori qavatlar investorlar uchun ofis maydonlari sifatida ajratilgan.
Rejaga ko'ra, markazda yil davomida 15 ta tarmoq yo'nalishi bo'yicha doimiy ko'rgazma va yarmarkalar o'tkaziladi. Bu yerda davlat idoralari vakillari va biznes sub'ektlari to'g'ridan-to'g'ri muloqot qilish imkoniyatiga ega bo'ladi.
Farg'ona tajribasi asosida kelgusida bunday innovatsion markazlarni Toshkent shahri, Buxoro, Jizzax va Samarqand viloyatlarida ham qurish belgilandi. Davlat rahbari tashrif davomida mashinasozlik, elektrotexnika, farmatsevtika va zargarlik kabi sohalardagi mahsulotlar namoyishi bilan tanishdi.
Shuningdek, viloyat uchun strategik ahamiyatga ega bo'lgan yirik investitsiya loyihalari taqdimoti o'tkazilib, prezident investorlar bilan istiqbolli rejalar yuzasidan muloqot qildi.
