Pragada Yevropaning eng yirik Bitcoin konferensiyasi bo‘lib o‘tadi

Chexiya poytaxtida 2026-yilning 11-13-iyun kunlari Yevropaning eng yirik Bitcoin tadbirlaridan biri hisoblangan BTC Prague konferensiyasi o‘zining to‘rtinchi mavsumini boshlaydi. Bu haqda Zamin.uz xabar berdi.

PVA Expo Prague majmuasi mezbonlik qiladigan mazkur anjumanda 8 500 nafardan ortiq investorlar, dasturchilar, tadbirkorlar va soha qiziquvchilari ishtirok etishi rejalashtirilgan. Cointelegraph.com nashrining ma’lum qilishicha, joriy yilgi dastur nafaqat texnik yechimlar, balki moliyaviy suverenitet, sun’iy intellekt, bioxaking va sog‘lom turmush tarzi kabi zamonaviy mavzularni ham o‘z ichiga oladi.

Anjuman doirasida to‘rtta alohida sahnada ekspertlar ma’ruzalari va dolzarb munozaralar tashkil etiladi. Xususan, Freedom Tech Summit qismi ochiq kodli dasturiy ta’minot va maxfiylik texnologiyalariga bag‘ishlangan amaliy mashg‘ulotlar bilan boyitiladi.

Shuningdek, Lobkowicz Palace saroyida bo‘lib o‘tadigan Bitcoin Corporate Day tadbiri institutsional investorlar va yirik moliya institutlari rahbarlari uchun o‘zaro hamkorlikni kuchaytirishga xizmat qiladi. BTC Prague Expo ko‘rgazmasi doirasida 100 dan ortiq kompaniyalar o‘z innovatsion mahsulotlarini, jumladan, apparat hamyonlari, mayning qurilmalari va ta’lim resurslarini taqdim etadi.

VIP mehmonlar uchun esa alohida xizmat ko‘rsatish zonalari ajratilgan. Praga shahrining kripto-texnologiyalar rivojidagi tarixiy o‘rni va qulay infratuzilmasi ushbu tadbirni jahon miqyosidagi muhim iqtisodiy maydonlardan biriga aylantirmoqda.