Farg'onada investorlar markazi va «Farg'ona ekspo» ko'rgazma markazi Prezident e'tiborida

O'zbekiston Respublikasi Prezidenti Shavkat Mirziyoyev Farg'ona shahriga qilgan tashrifining ikkinchi kunida yangi tashkil etilgan Investorlarga xizmat ko'rsatish markazi faoliyatini ko'zdan kechirdi. Ushbu markaz hududning investitsion jozibadorligini oshirishga qaratilgan muhim tashabbus sifatida baholanmoqda. Prezident, shuningdek, Farg'ona shahrida barpo etilgan «Farg'ona ekspo» xalqaro ko'rgazmalar markazini ham ziyorat qildi.

«Farg'ona ekspo» markazi viloyatning sanoat potensialini namoyish etish, ishlab chiqaruvchilar o'rtasida hamkorlikni mustahkamlash va eksport hajmini kengaytirish maqsadida bunyod etilgan. Mazkur majmua tadbirkorlar, ishlab chiqaruvchilar va investorlar uchun muloqot qilish, yangi g'oyalar almashish va hamkorlik kelishuvlariga erishish imkonini beruvchi platforma vazifasini o'tamoqda. Qariyb besh gektar maydonni egallagan markazda 200 dan ortiq mahalliy korxona o'z mahsulotlarini taqdim etmoqda.

Yangi binoning birinchi qavatlari savdo, investitsiya va tadbirkorlikni qo'llab-quvvatlashga qaratilgan tashkilotlarga ajratilgan bo'lib, yuqori qavatlar investorlar va biznes vakillari uchun ofis sifatida tashkil etilgan. Joriy yil davomida markazda 15 ta turli yo'nalishdagi ko'rgazma va yarmarkalar o'tkazilishi rejalashtirilgan. Bu davlat idoralari, eksportchilar, ishlab chiqaruvchilar va investorlar o'rtasida amaliy hamkorlikni rivojlantirishga yordam beradi.

Farg'ona tajribasidan foydalanib, kelgusida Toshkent shahrida hamda Buxoro, Jizzax va Samarqand viloyatlarida ham xududiy ko'rgazma markazlari barpo etish rejalashtirilmoqda. Prezidentning tashrifi davomida mashinasozlik, elektrotexnika, zargarlik, charm-poyabzal, hunarmandchilik, tibbiyot va farmatsevtika sohalaridagi ko'rgazmalar bilan tanishdi. Viloyat uchun muhim bo'lgan investitsiya loyihalari taqdimoti ham o'tkazildi va Prezident investorlar bilan fikr almashdi.