Rossiya maxsus xizmatlari Putinning xavfsizlik choralarini kuchaytirdi

Putinning xavfsizlik choralari fitna va suiqasd xavfi sababli kuchaytirildi

G'arb razvedka xizmatlari Rossiya rahbariyatida Putinning xavfsizligiga nisbatan xavotirlar ortib borayotganini ma'lum qildi. Bu haqda Zamin.uz xabar berdi.

CNN, Financial Times va «Vajnie istorii» nashrlari Yevropa Ittifoqi davlatlaridan birining hisobotiga tayanib, hatto dronlar yordamida suiqasd uyushtirilishi mumkinligi haqida xabar berdi. Mavjud tahdidlar fonida Federal qo'riqlash xizmati prezidentni himoya qilish tartibini sezilarli darajada qat'iylashtirdi.

Olingan ma'lumotlarga ko'ra, Putinning harakatlanish yo'nalishlari cheklangan bo'lib, u hozirda faoliyatini asosan maxsus himoyalangan ob'ektlarda davom ettirmoqda. Shuningdek, prezident ayrim qarorgohlariga borishdan voz kechgan.

Nazorat tadbirlari faqat davlat rahbari bilan cheklanib qolmay, uning yaqin atrofidagi xodimlarga ham tatbiq etilmoqda. Xususan, xizmatchilarning aloqa vositalaridan foydalanishi va jamoat transportida yurishi taqiqlangani aytilmoqda.

Razvedka hisobotida ba'zi yuqori martabali amaldorlar ehtimoliy xavf manbai sifatida ko'rsatilgan. Mutaxassislarning tahlillariga ko'ra, Rossiya kuch tuzilmalari o'rtasida yuzaga kelgan ichki ziddiyatlar xavfsizlik bilan bog'liq vaziyatni yanada murakkablashtirmoqda.

Hozirda Kreml ma'muriyati ichki fitna ehtimolini pasaytirish maqsadida barcha choralarni ko'rmoqda.