Braziliyaning Espiritu-Santu shtati, San-Gabriel-da-Palya shahri yaqinida istiqomat qiluvchi 36 yoshli fermer huquqni muhofaza qiluvchi organlar tomonidan hibsga olindi. Bu haqda Zamin.uz xabar berdi.
Erkakning qo‘lga olinishiga sun’iy intellekt texnologiyasi bilan olib borgan yozishmalari sabab bo‘lgan. Ma’lum bo‘lishicha, fermer ChatGPT platformasi orqali o‘z farzandiga nisbatan og‘ir jinoyat sodir etishni rejalashtirayotganini ma’lum qilgan.
Ushbu holat sun’iy intellekt tizimlarining xavfsizlik mexanizmlari va ularning jamiyatdagi xavflarni oldini olishdagi o‘rni masalasini yana bir bor kun tartibiga olib chiqdi. OpenAI kompaniyasi foydalanuvchi tomonidan yuborilgan xavfli mazmundagi xabarni aniqlaganidan so‘ng, zudlik bilan AQSH rasmiylariga xabar bergan.
Xalqaro hamkorlik doirasida ma’lumotlar Braziliya politsiyasiga yetkazilgan va bu tezkor choralar ko‘rilishiga imkon yaratgan. Hozirda mazkur voqea yuzasidan tergov harakatlari olib borilmoqda.
Mazkur hodisa raqamli platformalarning xavfsizlik qoidalari nafaqat texnik nazorat, balki real hayotdagi jinoyatlarning oldini olishda ham muhim vosita ekanligini ko‘rsatdi.
Izohlar
0