AQShda Tramp tasviri tushirilgan maxsus pasportlar chiqariladi

AQSh Davlat departamenti mamlakat mustaqilligining 250 yilligi munosabati bilan cheklangan miqdordagi yangi pasportlar seriyasini taqdim etdi. Bu haqda Zamin.uz xabar berdi.

Mazkur hujjatlarning o'ziga xos jihati shundaki, ularning ichki sahifalaridan birida Prezident Tramp tasviri joy oladi. Shuningdek, dizayn asosida AQSh mustaqilligi asoschilariga bag'ishlangan turli tasvirlar ham o'rin egallashi ko'zda tutilgan.

Ushbu maxsus seriyadagi pasportlar faqat Vashington shahridagi pasport agentligi tomonidan tarqatiladi. Ta'kidlanishicha, mazkur bo'limda zaxiradagi cheklangan nashr tugamagunga qadar boshqa turdagi hujjatlar berilmaydi.

Davlat departamenti prezident tasviri tushirilgan pasportni olishni istamagan fuqarolar uchun muqobil variantlarni ham ma'lum qildi. Bunday shaxslar standart namunadagi hujjatlarni rasmiylashtirish uchun onlayn xizmatlardan foydalanishlari yoki boshqa hududiy pasport bo'limlariga murojaat qilishlari mumkin.

Yangi dizayn AQShning chorak ming yillik to'yi doirasidagi ramziy loyihalardan biri hisoblanadi.