Tramp va Charlz III Oq uyda uchrashdi

Oq uyda Tramp va Charlz III uchrashuvi bo'lib o'tdi

AQSh ma'muriyati ijtimoiy tarmoqlarda e'lon qilgan yangi surat xalqaro siyosiy doiralarda keng muhokamalarga sabab bo'ldi. Bu haqda Zamin.uz xabar berdi.

AQSh prezidenti Tramp va Buyuk Britaniya qiroli Charlz III uchrashuvidan olingan ushbu tasvir «Ikki qirol» sarlavhasi bilan taqdim etildi. Mazkur ramziy voqea ortidagi siyosiy jarayonlar tahlilchilar e'tiborini tortdi.

Buyuk Britaniya monarxi Charlz III va qirolicha Kamillaning AQShga rasmiy tashrifi doirasida Oq uy maysazorida olingan surat hukumatning rasmiy sahifasiga joylashtirildi. Unda kulib turgan prezident va monarx tasvirlangan bo'lib, ostiga «Ikki qirol» deb izoh qoldirilgan.

Ushbu holat ikki davlat o'rtasidagi yaqin aloqalarni ifodalashga qaratilgan bo'lsa-da, tahlilchilar buni o'ziga xos siyosiy ishora sifatida baholamoqda. Reuters agentligi xabariga ko'ra, Tramp o'z faoliyati davomida monarxiya timsollaridan bir necha bor foydalangan.

Xususan, 2025 yil oktyabr oyida u sun'iy intellekt yordamida tayyorlangan videoni e'lon qilgan edi. Unda toj kiygan prezident qiruvchi samolyotda namoyishchilar ustidan uchib o'tgani aks etgan.

Shuningdek, boshqa roliklarda u qirollik libosida va qilich bilan tasvirlangan bo'lib, unda siyosiy raqiblar tiz cho'kkan holatda ko'rsatilgan. Avvalroq u o'zini diniy timsollar bilan bog'lovchi suratni ham ulashgan, biroq tanqidlardan so'ng uni o'chirib tashlagan edi.

Prezidentning ramziy chiqishlari fonida AQShning 50 ta shtatida «Yo'qolsin qirollar» (Down with Kings) harakati faollashdi. Mart oyining oxiri va aprel oyi boshida mamlakatda yirik norozilik aksiyalari qayd etildi.

Namoyishchilar avtoritarizmdan voz kechish, migratsiya siyosatini yumshatish va Eron bilan yuzaga kelishi mumkin bo'lgan harbiy konfliktni to'xtatishni talab qilmoqdalar. Kongressdagi respublikachilar esa ushbu mitinglarni tanqid qilib, ularni davlatga nisbatan nafrat ifodasi deb atamoqdalar.

Shunga qaramay, ushbu norozilik to'lqini mamlakatdagi jiddiy siyosiy omilga aylandi.