Marsel klubi Obameyangni sotuvga qo‘yganini ma’lum qildi

Fransiyaning "Marsel" futbol klubi o‘z hujumchisi Per-Emerik Obameyang bilan xayrlashishga qaror qildi. Bu haqda Euro-football.ru xabar berdi.

Bu haqda taniqli jurnalist Ekrem Konur ma’lum qildi. Klub rahbariyati 37 yoshli gabonlik futbolchining yuqori maoshidan voz kechishni maqsad qilgan.

Manbaga ko‘ra, "Marsel" rahbariyati tajribali hujumchini 1,5 million yevro evaziga sotib yuborishga tayyor. Hozirgi kunda futbolchiga Turkiyaning "Trabzonspor", "Beshiktosh" va "Chorum" klublari jiddiy qiziqish bildirmoqda.

Shuningdek, Obameyang xizmatlariga Ispaniya, Italiya va AQSH chempionati vakillari ham qiziqish ko‘rsatmoqda. Eslatib o‘tamiz, Obameyang "Marsel" safiga o‘tgan yilning yozida kelib qo‘shilgan edi.

Tomonlar o‘rtasidagi amaldagi shartnoma yana ikki yilga mo‘ljallangan. O‘tgan mavsum davomida hujumchi Fransiya chempionati va boshqa turnirlarda jami 41 ta uchrashuvda maydonga tushdi.

U mazkur o‘yinlarda 14 ta gol urishga muvaffaq bo‘ldi hamda 10 ta golli uzatmaga mualliflik qildi. Hozirgi vaziyatda klub moliyaviy xarajatlarni qisqartirish maqsadida ushbu transferni amalga oshirish niyatida.