Ispaniyaning «Barselona» klubi Belgiyaning «Bryugge» jamoasi yarim himoyachisi Yesse Bisivuni o‘z safiga qo‘shib olganini rasman e’lon qildi. Bu haqda Euro-football.ru xabar berdi.
Kataloniyaliklar 18 yoshli iqtidorli vinger bilan 2031-yilning 30-iyuniga qadar mo‘ljallangan uzoq muddatli shartnoma imzoladi. Yosh futbolchi keng jamoatchilikka 2025-yilda o‘tkazilgan 17 yoshgacha bo‘lganlar o‘rtasidagi Yevropa chempionatida tanildi.
Mazkur turnirda Belgiya terma jamoasi yarim finalgacha yetib borgan bo‘lsa, Bisivu ko‘rsatgan yorqin o‘yini bilan musobaqaning ramziy terma jamoasidan joy olishga muvaffaq bo‘ldi. «Barselona» klubi rasmiy bayonotida ta’kidlanishicha, yosh o‘yinchi o‘zining yuqori tezligi, jismoniy baquvvatligi va texnik imkoniyatlari, xususan, dribling mahorati bilan jamoadoshlaridan ajralib turadi.
O‘tgan mavsum davomida Yesse Bisivu «Bryugge»ning o‘rinbosarlar jamoasi safida Belgiya ikkinchi ligasida 15 ta uchrashuvda maydonga tushdi. Shuningdek, u UEFA Yoshlar ligasida ham o‘zini ko‘rsatib, 8 ta o‘yinda 3 ta gol urishga va 1 ta golli uzatmani amalga oshirishga erishdi.
Mutaxassislar futbolchining bu transferini kataloniyaliklarning kelajak uchun qo‘ygan muhim qadamlaridan biri sifatida baholamoqda.
Izohlar
0