"Yuventus" klubi yarim himoyachisi Duglas Luis faoliyatini Angliya premyer-ligasida davom ettirishi mumkin. Bu haqda Euro-football.ru xabar berdi.
"Tuttosport" nashrining xabar berishicha, braziliyalik futbolchi o‘z vakillariga "Manchester Yunayted" safiga o‘tish istagini bildirgan. Ayni paytda manchesterliklar jamoasi markaziy yarim himoya chizig‘ini kuchaytirish ustida ish olib bormoqda va ushbu transfer variantini jiddiy ko‘rib chiqmoqda.
Tomonlar o‘zaro manfaatli bitim doirasida futbolchilar almashinuvini amalga oshirishi mumkin. Xususan, "Yuventus" klubi "Manchester Yunayted" hujumchisi Joshua Zirkzeega qiziqish bildirmoqda va Duglas Luisni ushbu futbolchiga almashtirish imkoniyatini o‘rganib chiqmoqda.
Eslatib o‘tamiz, Duglas Luis 2024-yilda "Aston Villa"dan 51 million yevro evaziga "Yuventus" safiga kelib qo‘shilgan edi. Uning Turin klubi bilan imzolagan amaldagi shartnomasi 2029-yilning 30-iyuniga qadar mo‘ljallangan.
O‘tgan mavsum davomida braziliyalik futbolchi turli jamoalar safida barcha musobaqalarda 34 ta uchrashuvda maydonga tushdi. Mazkur o‘yinlarda u bitta gol urishga muvaffaq bo‘ldi hamda ikkita golli pasga mualliflik qildi.
Hozircha klublar rasmiy muzokaralar bo‘yicha yakuniy qarorga kelishgani yo‘q, biroq transfer bozori ochilishi bilan vaziyat yanada oydinlashishi kutilmoqda.
Izohlar
0