Yuventus Atalanta himoyachisi uchun Inter bilan kurash boshladi

"Atalanta" klubi himoyachisi Marko Palestra faoliyatini Yevropaning top-klublaridan birida davom ettirishi mumkin. Bu haqda Euro-football.ru xabar berdi.

Sport jurnalisti Mirko Di Natalening xabar berishicha, futbolchiga bo‘lgan qiziqish ortmoqda va "Yuventus" klubi uni o‘z safiga qo‘shib olish uchun kurashga kirishdi. Ayni damda "Inter" klubi transfer poygasida yetakchilik qilayotgan bo‘lsa-da, Turin klubi Italiya amaldagi chempionlari rejalarini buzish niyatida.

"Atalanta" rahbariyati o‘z tarbiyalanuvchisini qo‘yib yuborishga tayyor, biroq uning transferi uchun kamida 50 million yevro talab qilmoqda. Eslatib o‘tamiz, Marko Palestra 2025/2026-yilgi mavsumni "Kalyari" tarkibida ijara asosida o‘tkazdi.

Futbolchining Bergamo klubi bilan amaldagi shartnomasi 2029-yilning 30-iyuniga qadar mo‘ljallangan. Yakunlangan mavsumda u "Kalyari" safida barcha turnirlar doirasida 37 ta uchrashuvda maydonga tushib, bitta gol urdi va to‘rtta golli uzatmani amalga oshirdi.

Nufuzli Transfermarkt portali himoyachining bozor qiymatini 30 million yevroga baholamoqda. Kelgusi haftalarda tomonlar o‘rtasidagi muzokaralar yanada qizg‘in tus olishi kutilmoqda.