"Real Madrid" klubining yosh markaziy himoyachisi Viktor Valdepenyas yaqin orada faoliyatini boshqa jamoada davom ettirishi kutilmoqda. Bu haqda Euro-football.ru xabar berdi.
"Diario AS" nashri tarqatgan ma’lumotlarga ko‘ra, 19 yoshli ispaniyalik futbolchi qishki transfer oynasida klubini o‘zgartirishi mumkin. Xabarda aytilishicha, Germaniyaning "Ayntraxt" klubi yosh himoyachini o‘z safiga qo‘shib olishni maqsad qilgan.
Frankfurt klubi rahbariyati ushbu transfer bo‘yicha amaliy harakatlarni boshlagan va hozirda muzokaralar ijobiy ruhda davom etmoqda. Nemis klubi futbolchining kelajagiga katta ishonch bildirmoqda.
Viktor Valdepenyas "Real Madrid" asosiy jamoasidagi debyutini 2025-yil dekabr oyida "Alaves"ga qarshi uchrashuvda o‘tkazgan edi. Hozircha ushbu o‘yin futbolchining "qirollik klubi" safidagi yagona rasmiy ishtiroki bo‘lib turibdi.
Ma’lumot uchun, nufuzli "Transfermarkt" portali "Real Madrid" tarbiyalanuvchisining transfer qiymatini 5 mln yevroga baholamoqda. Muzokaralar yakuniga ko‘ra, futbolchining Germaniya chempionatiga ko‘chib o‘tishi haqida yaqin kunlarda rasmiy e’lon berilishi kutilmoqda.
