Saudiya Arabistonining muqaddas Makka shahri va Masjidul Haram hududida kuzatilayotgan kuchli yog‘ingarchilik hamda momaqaldiroq jiddiy tabiiy ofat xavfini yuzaga keltirdi. Bu haqda Zamin.uz xabar berdi.
Tabiatdagi keskin o‘zgarishlar va uzluksiz davom etayotgan jala oqibatida shahar infratuzilmasi hamda ziyoratgoh atrofidagi vaziyat murakkablashdi. Saudiya Arabistoni Milliy meteorologiya markazi (NCM) mintaqada suv toshqinlari va xavfli sel oqimlari yuzaga kelishi ehtimoli yuqori ekanligini inobatga olib, aholini hamda ziyoratchilarni ogohlikka chaqirdi.
Ushbu tashkilot tomonidan hudud uchun eng yuqori bo‘lgan qizil ogohlantirish darajasi e’lon qilindi. Ayni damda shahar ko‘chalarida kuchli bosim ostida harakatlanayotgan tezkor suv oqimlari kuzatilmoqda, bu esa transport qatnovi va piyodalar xavfsizligiga salbiy ta’sir ko‘rsatmoqda.
Mutaxassislar aholini zarurat bo‘lmaganda ko‘chaga chiqmaslikka va xavfsizlik qoidalariga qat’iy rioya qilishga chaqirmoqda. Favqulodda vaziyatlar xizmati xodimlari yuzaga kelishi mumkin bo‘lgan talofatlarning oldini olish maqsadida kuchaytirilgan tartibda ish olib bormoqda.
Hududdagi ob-havo sharoiti meteorologlar tomonidan doimiy nazorat ostida saqlanmoqda.
Izohlar
0