SpaceX Starship V3 raketasini 13-parvozga tayyorlay boshladi

SpaceX Starship V3 raketasining 13-parvozi uchun tayyorgarlikni boshladi

SpaceX kompaniyasi Starship V3 rusumidagi o'ta og'ir raketani navbatdagi sinovlarga tayyorlash jarayonini tezlashtirdi. Bu haqda Zamin.uz xabar berdi.

Ixbt.com nashrining Starship Gazer ma'lumotlariga tayanib xabar berishicha, Starship tizimining 40-raqamli prototipi Starbase bazasi hududidagi Massey poligoniga yetkazildi. Mazkur kema loyihaning 13-sinov parvozida qo'llanilishi ko'zda tutilgan.

Hozirgi bosqichda mutaxassislar konstruksiyaning mustahkamligi va germetikligini tekshirish maqsadida kriogen sinovlarini o'tkazmoqda. Jarayon davomida yonilg'i baklari o'ta sovuq suyuqlik bilan to'ldirilib, kema bosimga bardoshliligi nazorat qilinadi.

Ushbu tadbirlar yong'in sinovlari hamda parvoz oldi tayyorgarlikning muhim qismi sanaladi. Shuningdek, AQSh Federal aloqa komissiyasi (FCC) Super Heavy B20 va Starship S40 prototiplari ishtirok etadigan 13-parvoz davomida radiochastotalardan foydalanish uchun rasmiy ruxsatnoma berdi.

Rejaga ko'ra, tizimning 12-parvozi 12-may sanasidan oldin amalga oshirilmaydi. Unda Raptor 3 dvigatellari bilan ta'minlangan yangi avlod kemasi ilk bor sinovdan o'tkazilishi kutilmoqda.

Mazkur dvigatellar avvalgilariga nisbatan yuqori tortish kuchi, yengil vazni va tejamkorligi bilan ajralib turadi.