Rolls-Royce vodorod bilan ishlaydigan reaktiv dvigatelni muvaffaqiyatli sinadi

Rolls-Royce va easyJet vodorodli aviatsiya dvigatelini muvaffaqiyatli sinovdan o'tkazdi

Rolls-Royce hamda easyJet kompaniyalari Pearl 15 rusumli modifikatsiya qilingan dvigatelning yer usti sinovlarini yakunladi. Bu haqda Zamin.uz xabar berdi.

Mazkur qurilma yuz foiz vodorod yoqilg'isida va to'liq parvoz quvvatida ishlashga muvaffaq bo'ldi. Sinov jarayonlari AQSh hududidagi NASA poligonida tashkil etildi.

Bu haqda Ixbt.com nashri xabar bermoqda. Kompaniyalar taqdim etgan ma'lumotlarga ko'ra, dvigatel parvozning barcha bosqichlarini, jumladan, ishga tushirish, havoga ko'tarilish, kreyser rejimi va qo'nish jarayonlarini to'liq simulyatsiya qilgan.

Zamonaviy reaktiv texnika real sharoitlarga yaqinlashtirilgan muhitda gazsimon vodorod yordamida tekshirildi. Mazkur tadqiqot easyJet va Rolls-Royce o'rtasidagi uzoq yillik hamkorlik doirasida amalga oshirildi.

Bundan avvalroq hamkorlar Buyuk Britaniyada AE2100 dvigatelini yashil vodorodda, Germaniyada esa Pearl yonish kamerasini sinovdan o'tkazgan edi. Rolls-Royce vakillari ushbu dastur vodorod yoqilg'isining aviatsiya gaz turbinalaridagi holatini tushunishga xizmat qilganini bildirdi.

Jarayon davomida yoqilg'i yetkazib berish, yonish, boshqaruv tizimlari va avariya ssenariylari tahlil qilindi. Shunga qaramay, vodorodli samolyotlardan tijorat maqsadlarida foydalanish uchun hali vaqt talab etiladi.

Hozirda soha mutaxassislari oldida yoqilg'ini saqlash, aeroportlar infratuzilmasini tayyorlash va samolyot konstruksiyalarini yangi talablarga moslashtirish kabi murakkab vazifalar turibdi.